Friday, December 21, 2007

Band Darwazoon Se Uljhan Hoti Hay Mujhay


Band Darwazoon Se Uljhan Hoti Hay Mujhay

Aisa Lagta Hay k Jaisy

Mery Honton Pe Kisi Ne

Meri Saansein Rok Di Hon

Mujhay Band Darwazey Achay Nahi Lagtay

Barson Pehlay Uss Ne b To Aisa Hi Kiya Tha

Aik Hi Pal Mein

Aik Hi Ghari Mein

Ajnabi Ban Gayi Thi Vo

Hawa Samjha Tha Main Usay

Meri Har Ik Saans Mein Shamil Thi Vo

Magar...Hawa Jab Aandhi Ban Jaye

To Saansein Rukney Lagti Hain

Rishtay Girnay Lagtay Hain

Hum Donoo k Beech b Kayi Darwazey Thy

BeYaqeeni Aur Shakk k Darwazey

k Band Rahein To Aitbaar Ghatay

Aur Khul Jayein To Saans Ghutay

Aur Phir Aik Din Uss Ne

Hamary Rishtay Ka

Vo Aakhri Darwaza b

Mery Chehrey Pe Band Kar Diya

Bas Usi Din Se

Mujhay Band Darwazey Achay Nahi Lagtay

Band Darwazey Udas Kartay Hain

Yehi Soch Kar Shehar Se Zara Door

Ik Kachi Sadak k Kaandhay Par

Ik Ghar Banaya Tha Main Ne

Jab Darwaza Laganey Ki Bari Aayi

To Maimaar Bola

"Kiun Sahib"Kaisa Darwaza Chahiye?

Aur Phir Usi Saans Mein Kayi Kismein Ginwa Dein

"Nahi Dost,Darwaza Nahi Chahiye"

Vo Hairat Se Khamosh Ho Gaya

Main b Chup Raha

Usay Kya Batata

Band Darwazey Udas Lagtay Hain

Jaisy Zindagi Ki Tez Hawaon Mein Meri Saansein Rukti Hain

Wesy Hi Deewaron Ki Sakhti Mein

Un Ka Dam b GhutTa Hoga

Un Ka Gham b Barhta Hoga

Isi Liye Bina Darwazey k Ghar Tha Mera

Magar...Bina Darwazey k Ghar Khali Khali Lagta Tha

Meri Gurbat Kosoon Door Se Nazar Aati Thi

Isi Muflisi Ko Chupanay k Liye

Aangan Mein Ik Pairr Lagaya

Apna Khali Ghar Chupaya

Phir Chand Dinoon Baad Suna k

Ik Mushkil Aan Pari Thi Usay

"Uss Ka Jahaiz"

Han Uss Ki Shadi Honay Ja Rahi Thi

Vo b Kya Karti

Qadam Qadam Chalney Ki Sakat Nahi Thi Uss Mein

Chahti Thi k Bas Khari Rahey

Aur Pairon Talay Se Rastay Siraktay Jayein

Magar Raston k Kahan Paaon Hotay Hain

Bas Achay Dinoon Ki Talash Mein Chalti Rahi

Aik Chhaon Ki Talash Mein Jalti Rahi

Bohat Dinoon Baad Aik Rishta Aaya Tha Uss k Liye

Jahaiz Na Diya To Kahin Toot Na Jaye

Bojhal Haathon Se

Barsoon Baad Main Ne

Phir Usi Darwazey Par Dastak Di

Jo Uss Ne Mery Chehray Par Band Kiya Tha

Socha....Agar Usi Ne Darwaza Khola To Qayamat Hogi

Magar Qayamat To Barsoon Pehlay Guzar Chuki

Ik Ajnabi Chehrey Ne Darwaza Khola

Thakay Haathon Se Paisoon Ki Ik Potli Usay Thama Aya

Bina Darwazey Ka Makaan Girvi Rakh Aya Tha Main

Jaisi b Thi

Meri Jaan Thi Vo

Mery Liye Mera Jahan Thi Vo

Phir Suna k Bari Dhoom Se Shadi Hoyi Thi Uss Ki

Kayi Din Uray

Apna Ghar Kho Chuka Hon

Makaan Churaney k Liye Paisy Nahi Thy

Magar Iss Umeed Par Ghar Ki Simat Chalta Ja Raha Hoon

k Kon Khareedy Ga Bina Darwazey Ka Ghar

Kon Rahay Ga Khali Deewaron Mein

Uss Kachay Rastay Se Morr Kata

Jis k Kaandhey Pe Apnay Ghar Ka Zimma Chora Tha

Rasta Sara Jhulas Gaya Hay

Uss Kachay Rastay Pe Parney Wali chhaon Ko Kisi Ne Kat Diya Hay

Aangan Sara Ujarr Gaya Hay

Vo Tanha Pairr

Mery Aangan Mein Nahi Raha Hay

Ghar Ki Janib Qadam Barhay

To Deewaron Ne Rasta Rok Liya

Ik Darwazey Ne Rasta Rok Liya

Mery Aangan Mein Lagay Pairr Ko Kaat Kar

Darwaza Bana Diya Hay Kisi Ne

Darwazey Ki Lakrri mein Jhari Gaanthein

Uss Darwazey Ki Aankhein Hain

Ab Tak Mujh Ko Dekh Rahi Hain

Uss Ki Aankhon Se Aankhein Nahi Mila Pata

Ab Nazrein Jhuki Hain Meri

k Mujh Se Band Darwazey Ki Udasi Dekhi Nahi Jati...!!!

No comments: