Sula Dai Mujh Ko

Gungunatey Hoay Aanchal Ki Hawa Dai Mujh Ko
Ungliyaan Phair Ker Baloun Mein, Sula Dai Mujh Ko

Jiss Tarah Faaltu Guldaan Parey Rehtay Hein
Apnay Ghar Kai Kisi Koney Sai Laga Dey Mujh Ko

Yaad Kar Kai Mujhay Takleef He Hoti Ho Gi
Eik Qissa Hoon Purana Sa, Bhula Dai Mujh Ko

Dubtay Dubtay Aawaz Teri Sun Jaoun
Akhri Baar Tu Sahil Sai Sada Dai Mujh Ko

Mein Teray Hijar Mein Chup Chap Na Mar Jaoun Kahein
Mein Hoon Saktey Mein, Kabhi Aaa Kar Rula Dai Mujh Ko

Dekh Mein Ho Gaya Hoon Badnaam Kitabon Ki Tarha
Meri Tashheer Na Kar, Ab To Jala Dai Mujh Ko

Roothna Tera, Meri Jaan Liye Jata Hai
Aisay Naraz Na Ho,Hans Kai Dikha Dai Mujh Ko

Log Kehtay Hein Kai Yeh Ishq Nighal Jata Hai
Mein Bhi Is Ishq Mein Aya Hoon,Duaa Dai Mujh Ko

Yahi Auqaat Hai Meri Teray Jeevan Mein
Koi Kamzor Sa Lamha Hoon,Bhula Dai Mujh Ko

Aur Kuch Nahien Manga Meray Maalik Tujh Sai
Us Ki Galiyoun Ki Khak Bana Dai Mujh Ko....!